Leygardagin klokkan 12 hevur altjóða hondbóltssambandið, IHF lutakast til triðja og endaliga undanumfarið til HM-endaspælið í manshondbólti í januar í 2025, ið verður leikt í Noregi, Danmark og í Kroatia.
Føroyar eru millum tey 22 evropeisku liðini, ið skulu kappast um at vinna seg til HM-endaspælið.
Vit eru í potti 2, og vit skulu spæla ein heimadyst og ein útidyst móti einum liði úr potti 1 um rættin at taka lut í HM-endaspælinum um eitt ár. Dystirnir vera spældir millum 6. og 12. mai.
Liðini í potti 1 sum Føroyar kunnu møta eru:
Slovenia, Ungarn, Portugal, Eysturríki, Ísland, Niðurlond, Spania, Montenegro, Kekkia, Póland og Norðurmakedonia.
Spurdur um hvønn hann vil sleppa at møta í HM-undankappingardystunum, svarar Hákun West av Teigum: - Eg vil sleppa at møta Norðurmakedonia, heilt klárt. Norðurmakedonia er eitt lið við nógvum sveiggjum, har er ikki altíð so nógvur strukturur. Men hóast teirra trupuleikar, so hava teir leikarar, ið spæla á høgum støði. Øll liðini í hesum potti vera torfør, men eg fyritrekki Norðurmakedonia. Sigur Hákun West av Teigum í stuttari viðmerking til in.fo.
