Víkingur byggir nógv av spæli sínum upp um álopskendur vongverjarnar, Bárður J. Hansen og Hanus Jacobsen, og var tað tískil teimum ein smeitur, at teir eiheldur vóru við í dystinum vegna skaða. Enn ein smeitur var tað, at liðskiparin og verjukempan, Atli Gregersen, eiheldur var við vegna leikbann.
Hjá KÍ er lagið hinvegin betri. Undan dystinum høvdu teir vunnið tríggjar dystir á rað, og sjálvsáliti hjá unga og lokala liðnum er ikki til at fara skeivur av.
Einki mál
Eftir eina varliga og javna byrjan var tað KÍ, sum setti seg við róðrið og hevði hug at skapa dystin. Víkingur átti ikki stórt meiri enn eitt vandamikið langskot frá afturvenda Lasse Qvist, men András Gángó bjargaði væl.
KÍ hevði hinvegin ikki trupulleikar at spæla seg til málmøguleikar. Hin størsta fekk Páll A. Klettskarð, sum eftir eitt væl spælt álop kom at standa leysur í brotsteiginum, men stútarin endaði á stongini.
KÍ var uttan iva betra liðið í fyrra hálvleiki. Teir spældu skjótan og góðan fótbólt og høvdu eyðsæð fleiri svar upp á at lata Víkinga-verjuna upp, heldur enn øvugt.
Mál komu tó eingi í fyrra hálvleiki og var hálveiksstøðan tískil 0-0.
Hjalgrím Elttør!
Í seinna hálvleiki var spælið meiri javnt og Víkingur kom betur við. Teir stóru málmøguleikarnir vóru ikki til at fáa eyga á, mest langskotsroyndir og hálvir málmøguleikar.
Júst sum Víkingur sá út til at hava fingið tamarhald á og megnað at troyttað eitt KÍ-lið, sum legði nógva orku í strembanina eftir at fáa eitt mál, trínir Hjalgrím Elttør fram í ljósið og avger dystin. Hetta var eitt gott korter fyri leiklok. Hann fær bóltin á Víkinga-hálvuni, og so ger hann tað, sum hann er bestur til. Nevniliga at seta ferð á og bjóða av. Hann setti hegnisliga fleiri mótstøðuleikarar av, áðrenn hann sendi bóltin framvið Geza Turi og legði KÍ á odda 1-0.
Hetta gjørdist einasta málíð í dystinum, og varð Hjalgrím Elttør harvið krýndur sigursharri. Hetta er fjórði sigurin hjá KÍ á rað, sum nú hevur otað seg heilt upp á fjórða pláss. Víkingur tapti annað vikuskiftið á rað og skulu tú nú ansa sær, um oddasessurin ikki skal latast øðrum liðið – har eru nevniliga fleiri um boðið.
