Hvat gert tú, um tú ætlar tær út at gera hjálpararbeiði? Hvar vendir ein sær fyri at fáa vegleiðing? Hvørjir møguleikar eru? Hesir og nógvir aðrir spurningar mólu í høvdinum á Katrin á Neystabø, tá hon fyri knøppum ári síðan var liðug við sína útbúgving.
- Eg havi altíð ætlað mær at sloppið út í verðina, og tá eg var liðug við skúlan, var tíðin líka sum uppløgd. So eg fór á fund hjá Mellemfolkeligt Samvirke í Århus, sum regluliga skipar fyri tílíkum fundum, og endin var at eg fór til Gana at gera hjálpararbeiði, greiðir hon frá.
Tá hon fór at pakka sínar taskur, avgjørdi sambúgvin og vinkonan, Birita Wardum at koma við henni, og tá avtornaði vildi lítlasystirin, Ása á Neystabø, eisini koma við. Hon hevði júst gjørt seg lidna við sína miðnámsútbúgving. Tríggjar hvítar gentur við ljósum hári løgdu leiðina til Gana at undirvísa afrikonskum børnum, í einum fremmandum landi, har tær ikki ánaðu hvat bíðaði teimum har.
Hvat skal mann vænta?
- Áðrenn eg fór avstað, hugsaði eg nógv um hvussu tað mundi síggja út í Gana, og hvat eg kundi vænta. Men eg fekk onga veruliga mynd fram av hesum landinum. Eg hugsaði at tað var myrkt, fátæksligt og at tey kanska høvdu mold á gólvinum. Ella mundu tey yvirhøvur hava mold? Tá eg so kom har, fann eg út av at tey høvdu ikki rennandi vatn, sum eg heldur ikki hevði roknað við, har var ófatiliga heitt, larmandi og so framvegis. Men kortini var tað slettis ikki so galið. Til dømis fingu vit sengur at sova á, sigur hon.
Gana telist millum tey afrikonsku londini, sum eru rættiliga væl fyri. Landið liggur í Vesturafrika, og er gomul ensk koloni. Tað var torført at síggja mun á hvør hevði tað gott og hvør hevði tað minni gott, tí í skúlanum skuldu øll vera í skúlabúnum. Tað var ikki fyrr enn tær fóru heim at vitja børnini, at tær sóu hvussu misjavni standurin var millum børnini.
Tríggir mánaðir fóru framvið við tí rúkandi ferð, og síðan hendan túrin hava genturnar verið og vitjað Gana eina ferð. Og stendur tað til teirra, fara tær aftur til Gana í minsta lagi eina ferð afturat.
Tað er kortini ikki ókeypis at fara avstað sum sjálvboðin. Okkara gentur rindaðu 30.000 krónur til Mellemfolkeligt Samvirke áðrenn tær fóru úr Danmark, og hesir pengar tryggjaðu teimum tak yvir høvdið og mat hvønn dag. Harafturímóti nýtist ongum at brúka nógvan pening í Gana.
Føroyingar vilja stuðla
Hóskvøldið verður stóra stuðulstiltakið í Norðurlandahúsinum, har genturnar hava savnað nakrar av best umtóktu tónleikarum í Føroyum, umframt at tær hava skipað fyri eini uppboðssølu av listaverkum, sum byrjaði í morgun. Tá genturnar vóru í Miðlahúsinum í morgun, vóru fleiri boð komin inn, hóast uppboðssølan júst var upplatin. Endamálið er at savnað inn penging til at byggja skúla í Gana. Konsertin varð útseld alt fyri eitt, og fer peningurin óskerdur til skúlabyggingina. Áhugin millum føroyingar fyri at stuðla tiltakinum vísir seg at vera ovurhondsstórur.
- Nøkur hava sagt nei, tí tað tað er ímóti teirra prinsippum, og tí hava vit sjálvsagt virðing fyri. Men tey flestu hava víst ein sera stóran áhuga fyri tiltakinum, og hava sett seg í samband við okkum fyri at vita um tey kunnu hjálpa á onkran hátt.
Men stuðulstiltakið er ikki bara ein pengainnsavning.
- Vit fara at hava eitt upplýsandi tiltak, har Ása fer at greiða frá okkara upplivingum, og Anders Reimer Larsen frá Mellemfolkeligt Samvirke fer at greiða nærri frá Global Contact og teirra samstarvi við hjálparfelagsskapir í menningarheiminum.
Hetta gera tær, tí tær hava merkt eitt forvitni frá ungum, ið kundu hugsað sær at farið út í verðina at gjørt hjálpararbeiði.
- Fleiri ung droyma um at at sleppa at út at síggja verðina, tá tey til dømis eru liðug við sína miðnámsútbúgving. Tá velja nógv at fara at fjakka, men vit vilja við hesum tiltakinum fegin vísa á møguleikan at fara út í verðina at gera hjálpararbeiði í staðin. Fyri okkum var tað betri enn at ferðast, sigur Ása á Neystabø.
Tónleikur á Stuðulstiltakinum:
ORKA v/Eivør
Frændur
Boys in a Band
Høgni Lisberg
Dánjal
Bet Your Are William
Martin Joensen
Hallur Joensen
Lady Fire
Petur Pólson
Listafólk á Stuðulstiltakinum:
Høgni Thomsen
Vera Larsen
Maibritt Frederiksberg
Maria Mørkøre
Frits Johannesen
Øssur Mohr
Sirikit Jacobsen
Jón K. Poulsen
Bárður Dal Christiansen
Jóannes Lamhauge
Edith Mørkøre
Eli Smith
Harry Knusdsen
Ásla Rannvá Svendson
Nikolina Højgaard
Guðrun & Guðrun - Troyggja
Bergun Kass
Katrin Svabo Bech
Zacharias Heinesen
Beinta Vilhelmsen – Kjóli
Kristina Joensen
Eivør Pálsdóttir
Ann-Mari Mouritsen
Sámal Toftenes
Ása Thomsen
Hedvig Johansdóttir
Gunnar Streymoy
Sigrun Gunnarsdóttir
Yrkjarar, ið koma at lesa upp yrkingar:
Hanus Kamban og Marjun Syderbø Kjelnæs
Onnur innsløg:
Jóna Thomsen kemur at dansa
Uppboðssøla av 8 listaverkum - 6 málningar og 2 pløgg í konsertsalinum
23 listaverk eru á uppboðssølu frá 4. til 7. mai (framsýning í SMS og í Klingruni í NLH)
