Í dag fyri 30 árum síðan, tann 4. februar 1984, varð Eysturoyar Røktar og elllisheim í Runavík alment tikið í nýtslu. Thordur Niclasen, fyristøðumaður, sigur, at upprunaliga vóru tað einstaklingar sum slóðaðu fyri og fingu samstarv í lag við Lions Club í Eysturoy, og kommunurnar í Eysturoynni. - Á vári 1980 gjørdu tey felagsskapin “Eysturoyar Røktar-og ellisheim” og valdu bygginevnd/stýri. Síðan heimið varð tikið í nýtslu, er tað bygt út tvær ferðir. Fyrru ferð var í 1992 og seinnu ferð var í 2006. Sostatt er nú pláss fyri 70 fólkum umframt at 12 fólk í dagtilhaldinum. Kommunurnar í Eysturoynni hava við hesum lagt stóra orku í og virkað fyri dygdargóðum umstøðum til teirra, ið hava tørv á røktarheimsplássi, sigur Thordur Niclasen. Og tað er ikki at taka seg aftur í, at heimið hevur havt stóran týdning. Hesi 30 árini hava út ímóti 2600 fólk búleikast á heiminum í styttri ella longri tíðarskeið, sigur hann. Hann sigur, at tá ið heimið rundaði tey 25 árini, varð skipað fyri stórum almennum hátíðarhaldi. Men nú á 30 ára føðingardegnum verður einki alment hátíðarhald. | 
