Sunnukvøldið kl.23.30 verður stóra finalan í amerikanskum fótbólti, Super Bowl, sum fyri hundraðtals milliónir hyggjarar kring heimin eisini er eitt tiltak, har tey hittast og gera okkurt burturúr kvøldinum.
Eisini í Føroyum hevur Super Bowl hug at vinda upp á seg, og vit hava spurt nakrar føroyingar hvussu teir fara at halda Super Bowl, sum í ár er ímillum Tampa Bay Buccaneers og Kansas City Chiefs.
Navn: Bjarni Nielsen
Hvussu leingi hevur tú fylgt við amerikanskum fótbólti?
- Eg hugdi fyrstu ferð eftir Super Bowl millum Green Bay Packers og Denver Broncos í 1998, men havi fylgt við fast síðani 2006.
Hvat er tað við amerikanskum fótbólti, sum hugtekur teg?
- Eksplosiviteturin.
Hvørjum liði heldur tú við, og hvussu væl fylgir tú við?
- Packers fylgdi eg sera gjølla við frá 2006 til 2013, men tað er nógv minkað síðstu sjey árini.
Hvat væntar tú tær av Super Bowl í ár, og hvør væntar tú vinnur?
- Eg hopi at dysturin verður spennandi, men eg vænti tó at Chiefs eru ov sterkir og vinna aftur í ár.
Hvussu fert tú at halda Super Bowl í ár?
- Umborð á Eldborg í Norðsjónum, tó havi eg lokkað kokkin at gera chicken wings ein tíma áðrenn dyst.
