Báturin hevði loyvi at sigla við 100 ferðafólkum, men felagið, sum leigaði bátin til útferðina, kravdi, at nógv fleiri skuldu umborð.
Tað var frágreiðingin hjá reiðarínum, eftir at ein ferðamannabátur úr Bahrain holvdist og sakk ein lítlan fjórðing úr landi í gjárkvøldið. Tað var av besta veðri, tá vanlukkan hendi, og talsmaðurin hjá reiðarínum helt, at báturin kann vera farin runt, tí ov nógv fólk hava verið í øðrum borðinum.
Innanríkisráðið í Bahrain segði í dag, at vanlukkan kravdi minst 57 mannalív, og at tey flestu vóru útlendingar. Eftir ferðafólkalistanum vóru millum annað 25 bretar, 20 filipsoyingar, 10 suðurafrikanar og 10 egyptar við ferjuni.
Sambært innanríkisráðnum vóru 63 fólk bjargað á lívi fyrrapartin, og fleiri skip og kavarar leitaðu saman við amerikonskum hernaðartyrlum eftir teimum, sum ikki vóru komin afturíaftur.
