Atlantic Navigator
Atlantic Navigator er komin aftur av fyrsta túri. Skipari hendan túrin var Brandur Nólsoy, og nú mynstrað verður aftur í kvøld klokkan 18, verður Lion Petersen á brúnni.
Góð fiskitíð
Lion Petersen sigur, at tíðin frá hálvum januar og út í mai mánaða vanliga er góð til svartkjaft.
- Nú í byrjanini av árinum plagar fiskurin at standa tættur heilt har suðuri á Írlands-leiðini, bæði í ES sjógvi og eisini í altjóða sjógvi.
Hann sigur, at fiskurin vanliga er feitur í byrjanini av túrinum, men nú stundar til gýting, og tá ið svartkjafturin hevur gýtt, minkar hann í fiti, og úrtøkan fellir.
Svartkjafturin ferðast norðureftir, sum tað líður út á várið, og tá ið komið er út í mai mánaða, plagar hann at verða komin norður í føroyskan sjógv.
Spennandi tíð
- Hetta verður ein ótrúliga spennandi tíð hjá okkum, nú fiskitíðin verður hin besta, og framleiðsluútbúnaðurin umborð vísir seg at rigga, sum hann skal.
Lion sigur, at manningartalið umborð á Atlantic Navigator hendan túrin verður tað sama, sum á undanfarna túri, umleið 100.
Umframt føroysku manningina, sum er við flaggskipi norðoyinga, eru fólk úr nógvum øðrum londum eisini umborð á Atlantic Navigator. Tey flestu eru tó úr Noregi og Ruslandi.
Lion Petersen sigur, at talið av útlendingum liggur um 25%, og tað er tað, sum loyvt er.
- Eg haldi, at tað er útlendingalógin, sum sigur, at vit í mesta lagi kunnu hava 25% av útlendingum umborð, sigur skiparin.
Stór familja
Í samrøðu, vit høvdu við unga gentu, tá ið Atlantic Navigator fór fyrsta túrin, segði hon, at samanhaldið og vinarlagið umborð er gott.
- Umborð á Nærabergi vóru vit sum ein stór familja, segði gentan, sum fyrstu ferð fór til sjós í fjør summar.
