Tað er langt frá dreymi til veruleika. Tá ið skráin fyri 2017 varð almenn, var tað skjótt at ímynda sær møguleikan, at finalan um FM heitið fór at vera í grannauppgerðini í Gundadali í síðsta umfari.
Grannauppgerðin verður seinnapartin, men talan er ikki um FM finalu. B36 spælir fyri at vinna silvurkrónurnar, meðan tað er greitt, at HB endar á fimta plássi. Undan síðsta umfari eru tað níggju stig frá HB og fram til B36.
Harvið er tað greitt, at HB ikki verður umboðað í Europa næsta summar. Tað er sjálvandi eitt vónbrot. Stórt plástur á sárið verður tað, um kappingarárið endar við sigri ímóti grannunum í B36.
Tølini siga, at tað gongur sera javnt á, tá ið HB og B36 spæla. Seinastu tjúgu árini hava grannarnir í Gundadali spælt ímóti hvørjum øðrum 52 ferðir í landskappingini. B36 eigur átjan sigrar, HB eigur sekstan sigrar, og átjan ferðir hevur tað verið javnt. Málmunurin er 79-77 til fyrimun fyri B36.
Í báðum grannauppgerðunum fyrr í ár var úrslitið 2-2.
