Leo Poulsen
Tað eru eingi blíð orð, ið Jógvan Jákupsson, fyrrverandi starvsfólk á Dimmalætting, hevur um sína gomlu leiðslu.
- Eg legði serliga til merkis, at hetta nýggja felagið, sum Árni Gregersen hevur stovnað, D Media, hevur flutt allar ognir, tað eru teldur og borð, yvir í nýggja felagið, og har liggur so lønarkravið hjá nýggja stjóranum, Árna Gregersen, sigur Jógvan Jákupsson.
Nú er so líkt til, at hansara lønarkrav skal hava serligan framíhjárætt.
- Og tað merkir, at um ognirnar verða seldar, skal peningurin brúkast til at gjalda hansara løn og ikki lønirnar hjá hinum starvsfólkunum. Og hetta verður gjørt meðan teir vita, at felagið er á veg í skiftirættin, og tað ljóðar fyri mær sum selskapstøming um nakað, sigur Jógvan Jákupsson.
Hann dugir sjálvandi ikki at siga, um ætlanin verður broytt.
- Men tað ljóðar í hvussu er ógvuliga illgrunasamt í mínari verð, sigur Jógvan Jákupsson.
Virðini eru fyribils uppgjørd til 150.000 krónur.
- Tað ljóðar ikki nógv. Einaferð átti fyritøkan bæði hús og prentsmiðju, men har er ikki nógv eftir nú. Alt er flutt yvir í nýggja felagið, og tey virðir, ið liggja í tí felagnum, skulu nýtast til at gjalda løn til Árna Gregersen og bara hann, sigur Jógvan Jákupsson.
Rætta upp
Á skiftisrættarfundinum kom fram, at starvsfólkini ikki skuldu vænta nakra høga dividendu, helst 5%, møguliga 10%.
- Tað sigur mær somikið, at um nakar fær nakað sum helst frá ALS, so dekkar tað ríkiliga tað, ið vit annars kundu fingið frá Dimmalætting, sigur Jógvan Jákupsson.
Fyri onkran, sum hevur fingið starv longu aftur, fer tað kanska at gera eitt sindur av muni.
- Tað er ikki nógv, men tað er tað, tað er, og fólk skulu hava tað, tey eiga, sigur Jógvan Jákupsson.
Vónirnar um at fáa nakrar pengar eru kortini ikki stórar hjá fyrrverandi Dimmuarbeiðaranum.
- Beint nú snýr tað seg ikki um at fáa pengar, beint nú snýr tað seg um at fáa rudda upp í tí, sum ikki hevur gingið rætt fyri seg í alt, alt ov langa tíð, sigur Jógvan Jákupsson eftir skiftirættarfundin týsmorgunin.
