Tað eru nýggjar tíðir í føroyskum fótbólti. Tey, sum hava fylgt við mesta partin av tíðini, síðani tað í 1942 varð farið undir landskappingina, skulu eftir øllum at døma venja seg við heilt nýggjar siðir.
Í kvøld verður farið undir ellivta umfar í landskappingini. Skála eigur heimavøll á Tórsvølli ímóti KÍ. Hetta er fyrsta ferðin, at Skála eigur heimavøll í Gundadali. KÍ plagar at spæla í Gundadali ímóti HB og B36, og í 1977 átti Fram heimavøll í Gundadali.
Skála stóð seg væl í Klaksvík í fyrsta umfari, tá ið úrslitið grækarismessudag var málleysur javnleikur. Sunnudagin tapti Skála 4-0 í Gøtu, eftir at tað í fimm dystum á rað var eydnast at vinna úrtøku. Skála er á áttanda plássi, eitt stig omanfyri strikuna. Í tíggju dystum er málmunurin 7-13.
KÍ er ovast. Fimm tær seinastu ferðirnar hevur talan verið um fulla úrtøku, og tvær tær seinastu ferðirnar hevur úrtøkan verið 1-0 sigrar – á heimavølli ímóti HB og 07 Vestur. Málmunurin er 15-7.
At tað ber til at fella KÍ sást í hálvfinaluni í Runavík, tá ið NSÍ vann 3-0. Um sama mundið megnaði Skála í landskappingini 1-1 á útivølli ímóti NSÍ.
Hjá KÍ er Sørmundur Kalsø framvegis knæskaddur.
Hjá Skála hevur miðvallarin Ólavur Mikkelsen verið skaðadarvaður.
Skála-KÍ: Alex Troleis á Tórsvølli klokkan 19.00.
