Tað er ikki bara í Føroyum, at fólkavøksturin setir met. Í dag er nevniliga fagnaðardagur í norska høvuðsstaðnum Oslo, nú íbúgvatalið fyri fyrstu ferð er farið upp um eina millión.
- Nú mugu Stokkhólm og Keypmannahavn gevast við at reypa. Oslo er í sama báti, sigur borgarstjórin Raymond Johansen við norska blaðið Aftenposten.
Nýggja heitið sum milliónbýur varð veruleiki í dag, tá norska hagstovan, SSB, kunngjørdi nýggjastu tølini fyri íbúgvar og vísti at Stór-Oslo nú telur 1.000.647 íbúgvar, ið er ein vøkstur á 1,2 prosent seinasta árið.
Sambært Aftenposten umfatar Stór-Oslo eitt samanhangandi býarøki, ið telur 12 kommunur og 270 ferkilometrar.
Tað var serliga í árunum 2013 til 2017, at íbúgvatalið í norska høvuðsstaðnum vaks nógv. Hesi árini løgdust 64.000 íbúgvar aftrat høvuðsstaðnum, ið er ein vøkstur á 7 prosent.
Sambært framrokningunum hjá SSB fara 1.126.000 fólk at búgva í Stór-Oslo í 2030 og 1.208.000 fólk í 2040.
