Tað er alt ov lítið at hækka pensjónsaldurin upp í 68 ár í 2030.
Tað halda tey í Føroya Arbeiðsgevarafelag. Felagið tekur undir við, at vit fáa eina nýggja pensjónsskipan, so at vit yvir fáa ráð til eina virðiliga pensjón í framtíðini.
Landsstýrið hevur lagt eina nýggja pensjónsskipan fram, sum løgtingið fer at viðgera í næstum. Ein táttur í hesi skipanini er, at í 2030 skal pensjónsaldurin verða hækkaður upp í 68 ár og fimta hvørt ár skal hann síðani kanska hækkast eitt hálvt ár.
Men tað halda tey í Føroya Arbeiðsgevarafelag vera ov lítið. Tey halda, at skulu vit tosa um at spara útreiðslur til pensjón, er tað einki, ið ger so stóran mun, sum at hækka pensjónsaldurin.
Tí halda arbeiðsgevararnir, at tað er undarligt, at landsstýrið ikki hækkar aldurin nakað skjótari, og serliga heldur felagið, at tær fyrstu hækkingarnar eiga at verða settar nógv skjótari í verk.
