Hetlendingar eru stinnari enn føroyingar í skjóting.
Tað varð prógvað í tveimum skjótikappingum, sum Skjótisambandið hevði tikið stig til um vikuskiftið.
John M. Laurenson og Ross Work, úr Hetlandi, vitjaðu í Føroyum og royndu seg móti føroyingum í Skeet og Trap. Samlaða úrslitið var, at Hetland vann 114-102.
Tað varð lagt til brots leygarmorgunin, tá 9 luttakarar vóru í Skeet-kappingini á breytini hjá Sunda Byrsufelag á Norðskála.
Seinnapartin leygardagin vóru 12 luttakarar í Trap-kappingini á breytini hjá Byrsumálum í Sandvíkum.
Johnhard Klettheyggj, ein av føroysku skjúttunum, vísir á, at landsdysturin eydnaðist væl.
– Tú kann ikki beinleiðis siga, at føroyska landsliðið kappaðist móti hetlendingunum. Men vit vóru fleiri skjúttar, og hóast vit raktu ikki serliga væl, tí vindurin darvaði, so eydnaðist tiltakið væl, sigur Jonhard Klettheyggj.
Landsdysturin var hin fimti millum Føroyar og Hetland í skjóting. Í 1989, 1990 og 1993 vunnu hetlendingar, og føroyingar vunnu í 1994.
Tað hevur verið lítið virksemi í føroyskari skjóting seinastu 15 árini, og tí hevur ikki verið dystast um skjøldrið, sum John M. Laurenson og Ross Work hava við sær í viðførinum til Hetlands.
Skjøldrið hevur verið í Føroyum síðan dystin í 1994.
