G-festivalurin fór av bakkastokki í gjár og har var heilt fitt av fólki. Men tað hevur verið eitt sindur av fjálturi á, tí tað er ikki fyrrenn nú, í sjálvari festival-vikuni, at gongd kom á søluna av atgongumerkjum. Sigvør Laksá, stjóri á G-festivalinum, sigur, at korona hevur fingið føroyingr at broyta atburð, tí nú keypa tey ikki longur atgongumerki í góðari tíð, tí støðan hevur verið so óviss. Men nú í festival-vikuni og veðurvánirnar vóru góðar, kom rættilig gongd á - og nú minnir tað um gamlar dagar, áðrenn korona beindi fyri festivalunum.
Tað vóru heldur ikki serliga nógv fólk á tjaldingarøkinum mikudagin, tá ið tað læt upp, og í gjár, men tað legst til alla tíðina, nú veðrið er so gott, so har er eisini nógv fólk. Og sum nakað nýtt, eru tað eisini heilt nógv, sum gista í kampingvogni. Sigvør Laksá sigur, at tað eru tey ungu, sum gista á tjaldingarplássinum, men tey meiri tilkomnu, halda til í kampingvogni.
Annars eru tey vælnøgd við dagin í gjár og tað, sum farið er av hesum degnum. Teir heitu pottarnir eru fullir av fólki og sólin skínur, so fólk eru í røttum G-lagið, sigur hon. Hon sigur, at hjá henni snýr festivalurin seg í stóran mun um at lagið er gott og at fólk eru glað – og tað eru tey. Veðrið verður gott í dag og í kvøld og langt út á náttina. Men í morhin fer at regna og tað regnar allan dagin – men um náttúrðatíð slítur tað í, so verður aftur turt – men vindurin er lítið og eingin.
