- Tað gongst illa at fáa kommunulæknar at fara út á bygd at arbeiða.
Tað staðfestir Sirið Stenberg, landsstýriskvinna í heilsumálum.
Magnus Rasmussen, tingmaður fyri Sambandsflokkin hevur spurt hana, hvussu ætlanin er at loysa trupulleikan við kommunulæknum í Føroyum.
Sirið Stenberg staðfestir, at av teimum níggju læknadømunum í Føroyum, er tað bara Havnin, sum er fullmannað við kommunulæknum í føstum starvi.
Men tá ið ein kommunulækni í onkrum av hinum læknadømunum fer frá, er at kalla ógjørligt at manna starvið aftur við einum kommunulækna í føstum starvi.
- Hesi størv verða tí mannað við skiftandi avloysarum, sum aloftast eru útlendingar, sigur hon
Síðani 2003 hevur tað borið til at útbúgva seg í Føroyum til kommunulækna og higartil hava 16 tikið serútbúgving sína, ella partar av henni, í Føroyum, og teir flestu av teimum arbeiða eisini í Føroyum.
- Í løtuni eru 13 læknar undir serútbúgving í Føroyum, og tann fyrsti av teimum verður liðugur í næstu viku, sigur landsstýriskvinnan.
Hon vísir á, at sær, at kommunulæknaskipanin er vorðin alsamt meira ótíðarhóskandi og nú stendur hon á einum vegamóti.
- Skipanin, sum er nú, kann ikki halda fram, og hendir onki munagott sum skjótast, er vandi fyri, at kommunulæknaskipanin fer fyri bakka.
Tí verður mælt til, at alt landið verður skipað í heilsuøki við hvør sínum heilsudepli, har dentur skal leggjast á at hava og menna heilsufremjandi og sjúkufyribyrgjandi tilboð, kanningar, veitingar og ráðgeving, serliga til fólk við varandi sjúkum. Og har skal eisini dentur leggjast á at viðgera sjúklingar.
- Ætlanin er, at allar tær kanningar og viðgerðir, sum kunnu fara fram uttanfyri sjúkrahúsini, skulu fara fram á heilsudeplum.
Heilsudeplarnir skulu mannast við kommunulæknum, sjúkrarøktarfrøðingum, heilsufrøðingum, kliniskum kostfrøðingum, apotekarum, sálarfrøðingum, ljósmøðrum og bioanalytikarum.
Sirið Stenberg sigur, at strembað verður eftir, at nýggja skipanin við heilsudeplum í heilsuøkjum kring landið kann verða sett í verk 1. januar 2018.
