Svensku miðlarnir, Expressen og Aftonbladet, vistu mánadagin at siga frá einari syrgiligari arbeiðsvanlukku í Svøríki.
Talan var um eina lyftivanlukku á einum byggiplássi í Sundbyberg, nærindis Stokkhólmi.
Svensku miðlarnir vistu at siga, at lyftan datt umleið 20 metrar, áðrenn hon rakti vøllin.
Í fyrstani varð hildið, at fýra fólk høvdu latið lív, men tá til stykkis kom, lótu fimm fólk lív í arbeiðsvanlukkuni.
Í dag sigur veitarin av lyftini í tíðindaskrivi, at orsøkin til vanlukkuna helst er staðfest.
Og tað, sum er hent, er sambært veitaranum tað ringasta, sum kundi henda.
Sum skilst vísa myndir av byggiplássinum, at tvær sektiónir av lyftu-mastrini ikki vóru boltaðar saman.
- Hetta er ræðuligt, og slíkt má ikki henda. Hetta er avgjørt tað ringast hugsandi mistakið, sigur veitarin við svenska, Aftonbladet.
