– Tað fer at krevja nógv at røkka teimum málum, sum eg havi sett mær, sigur hon.
Hon vísir eisini á, at tað er hennara vón, at øll lokalfeløg Javnaðarfloksins tosa saman og koma til eina semju um eitt og sama valevni til nýggjan formann í Javnaðarflokkinum.
Hetta er ein sera skilagóð avgerð hjá Helenu Dam á Neystabø. Tað er einki dulsmál, at hon ikki varð væl móttikin av øllum, tá hon kom aftur í Javnaðarflokkin í 2002. Hon slapp til dømis ikki at stilla upp fyri Suðurstreymoyar Javnaðarfelag.
Men hon hevur megnað uppgávuna í Mentamálaráðnum væl. So væl, at hon hevur vunnið nógva virðing aftur millum javnaðarfólk. Við tað at hon ikki roynir eftir formanssessinum, men fer at stuðla tí, sum vald ella valdur verður, vísir hon, at tað ikki bara snýr seg um hennara egna persón.
Tað kann fara at líkjast eini farsu, nú so nógv bjóða seg fram – øll frá tí mest kontroversiella politikaranum til tann mest upplagda. Avgerðin um nýggja leiðaran kann tá blíva so tilvildarlig, at flokkurin verður gjørdur til láturs.
Helena Dam á Neystabø er tann fyrsta at vísa dirvi og virðing við ikki at gera valið um hægsta embætið í flokkinum ein eina farsu. Tað vísir ein sterkan politikara.
