Ukrainski uttanríkisráðharrin, Dmytro Kuleba, vil nú, at Z-merkið, sum verður brúkt sum stuðul fyri russisku innrásini í Ukraina, verður gjørt ólógligt.
Merkið hevur eitt nú verið brúkt á russiskum stríðsvognum og øðrum hernaðarakførum, sum eru við í krígnum móti Ukraina.
- Eg mæli øllum londum til at kriminalisera nýtsluna av Z-merkinum, sum er ein háttur at veita almennan stuðul til russisku krígsførsluna í Ukraina.
Tað skrivar Dmytro Kuleba á Tvitter.
- Z-merkið ímyndar russisk krígsbrotsverk, bumbaðar býir og í túsundatali av dripnum ukrainum. Almennur stuðul til hetta barbáríið eigur at forbjóðast, heldur uttanríkisráðharrin.
Í gjár segði týska innanríkisráðið, at fólk, sum brúka Z-merkið fyri at vísa sín stuðul til russisku innrásina, kunnu rættarfylgjast.
Myndugleikarnir í Berlin, Bayern og í Niedersachsen hava longu sagt, at nýtsla av Z-merkinum er revsiverd.
