34 ára gamli Heini Olsen úr Klaksvík, ognaði sær sunnukvøldið sín fyrsta IM-norm (International Master norm), tá hann vann OSS International í Norra. Heini fekk 6,5 stig av 9 møguligum, og tað var júst kravið til normin.
Tríggir tílíkir normar skulu ognast, fyri at kunna kalla seg altjóða meistari. John Arni Nilssen hevur tveir normar, meðan Flóvin Tór Næs og Heini Olsen hava ein hvør.
Heini hevur veruliga uppiborið normin; Í 1990´unum - tá hann einsamallur myndaði føroyska topptelving - var Heini fleiri ferðir millimetrar frá norminum. Men 2004 varð árið, har fimmfaldaði føroyameistarin (FM 1989, 1991, 1992, 1993 og 1999) fekk sítt altjóða gjøgnumbrot.
Klaksvíkingurin telvaði sera væl og støðugt í Norra. Fýra talv vann hann og leikti fimm javnleikir. Talvið hjá honum frá fimta umfari er við í blaðnum í dag. Eitt gott álopstalv.
