Hetta vikuskiftið er bygdarstevna á Sandi við ymsum tiltøkum á skránni, líka frá í dag til sunnukvøldið.
Eitt tað mest forvitnisliga tiltakið er, at fríggjakvøldið fer heimsins prúðasti maður í 1995 at vísa seg og sínar vøddar fram í ungmannafelagshúsinum Virkinum
Tað er Mr. Unviverse í 1995, sum tað árið var Roberto Morisho úr Niðurlondum, sum hevur leitað sær alla ta longu leiðina til Sands at vísa seg fram á bygdarstevnuni.
Hann fer at vísa seg fram í virkinum klokkan eitt í kvøld í sambandi við dansin í Virkinum.
Samstundis verður mótasýning við Kallkyni, Seytjan og Klædnabúðini í Skálavík
Tað er ungmannafelagið Virkið á Sandi, sum skipar fyri stevnuni hesuferð.
Stevnan gongur uppá skift ímillum tær fýra, stóru bygdirnar í Sandoynni, Sand, Skopun, Skálavík og Húsavík.
Sostatt gongur fýra ímillum, at stevnan er í hvørjari bygd.
Tað, sum kemur inn á stevnuni, verður brúkt at reka ungmannafelagið fyri og Lillian Clementsen, formaður í virkinum, dylir ikki fyri, at stevnan er hin mest týðandi inntøkukeldan hjá Virkinum.
Í dag verður annars tivoli, stevnuteitið.
Klokkan tvey fer nývaldi løgtingsmaðurin úr Sandoynni, Páll á Reynatúgvu at seta stevnuna.
Annars verður myndaframsýning í skúlanum, og klædnaframsýning verður á Grótteigum.
Klokkan trý leygardagin verður kappróður við áttamannaførum ímillum heimasandsmenn og skopunningar.
Á Sandinum verður eitthvørt, børn sleppa at rógva í ánni, og ein stuttan ríðitúr á hesti, postarenning verður, málskjóting, pylsusøla og tey, sum tora, sleppa at royna seg í Hvølvus hjá Ráðnum fyri Ferðslutrygd.
Á Midnáttarsamkomuni við bankan fer Finnur S. Olsen at halda talu.
Sunnudagin verður tivoli, kakutombola o.a.
Heimavirkaðar vørur verða at fáa.
Fornminnafelagið hevur framsýning í Norðaru Koytu og myndaframsýning í skúlanum.
Klokkan trý verður fótbóltsdystur ímillum 2. deild hjá B 71 og 1. deild hjá Sumbingum.
Aftaná dystin verður súkklukapping inni í dalinum, har í súkklarar, sum eru við í FM, eru við.
Har seta sandoyingar sítt álit á lokalu súkkluhetjuna, Sverra Mohr Edvinsson.
Føroyskur dansur verður klokkan 10, har í børn og ung úr Sandoynni, sum fara á dansistevnu til Danmarkar, fara at vísa fram føroyskan dans.
Klokkan hálvgum eitt byrjar so dansurin.
Stevnukvøldini eru eisini útimøti á skránni.
