Tveir aldursforsetar. Annar er aldursforseti í heiminum. Heimsins elsta fótbóltsfelag. Hin er aldursforsetin í Føroyum. Í juli mánaði komandi summar hittast hesi bæði feløgini við Stórá í Trongisvági.
Tað er ítróttarstjórin í TB, Hans Fróði Hansen, sum hevur sett seg í samband við Sheffield FC.
– Tað gingu bara tveir ella tríggir dagar, so høvdu vit eina avtalu, sigur Hans Fróði Hansen.
Orsøkin til venjingardystin móti enska felagnum er fyri at skapa nakað kring Tvøroyra Bóltfelag. Hans Fróði var fyri kortum settur sum ítróttarstjóti í felagnum og tað er eisini ein av orsøkunum til dystin
– Eg vil gjarna verða við til at gera okkurt fyri felagið og hetta er eitt gott høvið. Feløgini hava nakað til felags og hetta kann eisini verða við til at knýta bond millum feløgini, sigur ítróttarstjórin.
Tað er ikki endaliga greitt nær Sheffield FC kemur hendan vegin, men Hans Fróði vónar at tað verður í summarsteðginum í landskappingini. Sheffield FC, sum tá fyrireikar seg til kappingarárið 2013/14 skal á eina rundferð at spæla móti ymiskum øðrum feløgum eisini, so vitjanin her í Føroyum skal passa inn í skemaði.
Sostatt skulu tvey fótbóltsfeløg við samanlagt áleið 275 ára langari søgu hittast við Stórá í summar. Tað kann ikki annað enn vera met fyri ein dyst í Føroyum.
