Millum tey stívliga hundrað uppskotini, sum liðu vøggudeyðan nú løgmaður hevur útskrivað løgtingsval, er eitt uppskot um at seta á stovn eina nýggja heimarøktaraútbúgving í Føroyum.
Nú vil Sjálvstýrisflokkurin so royna at vekja uppskotið aftur til lívs. Hetta kann gerast við at fáa 13 tingmenn at taka undir við, at uppskotið eigur at samtykkjast í tinginum. Hendir so, so eigur tingformaðurin Jógvan Ingard Olsen at kalla tingið inn fyri at avgreiða hetta málið.
Tað má vera nú
Helena Dam á Neystabø, formaður í Sjálvstýrisflokkinum leggur dent á, at tað er týðandi at fáa hetta uppskotið samtykt í tinginum nú, tí skúlin skal byrja longu í summar. Verður tað ikki góðtikið nú, so fer øll ætlanin fyri skeytið:
? Eg fari at práta við hinar flokkarnar. Undir 1. viðgerð tóktist at vera rættiliga breið semja í tinginum um hetta uppskotið. So eg rokni við, at vit finna fram til eina loysn, sigur Helena Dam á Neystabø.
