Í dag handaði Heilsustýrið Súsonnu Bertholdsen, landsstýriskvinnu í heilsumálum, eina nýggja Tilbúgvingarætlan fyri Føroyar. Hetta er ein tilbúgvingarætlan, sum skal tryggja, at føroyska samfelagið er fyrireikað, skuldi ein heimsfarsótt aftur rakt.
Arbeiðið við ætlanini varð sett í gongd á várið 2023, tá ein arbeiðsbólkur varð mannaður við fakfólki frá ymsum heilsu- og tilbúgvingarøkjum í Føroyum. Ætlanin tekur støði í tilmælum frá WHO, umframt vitan og royndum frá COVID-19-farsóttini bæði í Føroyum og øðrum londum.
Í nýggju Tilbúgvingarætlanini er ein greið skipan við ábyrgdarbýti millum myndugleikar og onnur viðkomandi stovnssamstørv. Sum nakað nýtt, verður eitt operativt toymi skipað, sum skal tryggja skjót og samanhangandi átøk, um ein farsótt tekur seg upp. Harumframt leggur ætlanin stóran dent á fígging, atgongd til koppingarevni og verndarútgerð, eins og eitt skipað samstarv við danskar og norðurlendskar myndugleikar um neyðugar veitingar.
Landsstýriskvinnan í heilsumálum fegnast um, at eitt greitt grundarlag nú er lagt fyri eina haldgóða tilbúgving.
– Við hesi nýggju Tilbúgvingarætlanini hava vit eitt væl skipað grundarlag at byggja á, skuldi ein farsótt aftur rakt. Tað hevur týdning, at vit hava greitt ábyrgdarbýti og eitt skipað samstarv, soleiðis at øll neyðug átøk kunnu setast í verk beinanvegin. Tað tryggjar bæði fólkaheilsuna og virkisførleikan í samfelagnum, sigur Súsanna Bertholdsen, landsstýriskvinna í heilsumálum
Tilbúgvingarætlanin fevnir um tær ymsu ábyrgdirnar hjá heilsumyndugleikum, sjúkrahúsverki, kommunum, Apoteksverkinum og øðrum viðkomandi pørtum. Eisini verður dentur lagdur á at tryggja atgongd til koppingarevni og verndarútgerð, umframt at raðfesta samfelagsliga fyribyrging og tvørgeiraligt samstarv. Tilbúgvingarætlanin er samstundis partur av tilbúgvingini fyri Føroyar.
Landsstýriskvinnan hevur heitt á Heilsustýrið um at skipa fyri, at Tilbúgvingarætlanin verður sett í verk.
Tilbúgvingarætlanin er tøk her.
