Á eldraøkinum er Skálafjarðarsamstarvið, sum Runavíkar kommuna, Nes kommuna og Sjóvar kommuna mynda, rættiliga væl fyri.
Samstarvið hevur keypt og ræður nú yvir Røktar-og Ellisheiminum í Runavík, har pláss er fyri 70 búfólkum, og haraftrat eigur samstarvið eldrasambýlir.
Eitt annað mál, sum einki hevur við eldraøkið at gera, men sum somu kommunur eisini samstarva um, er Heilsudepilin í Runavík, sum nú fer at gerast veruleiki.
- Kommunurnar eru samdar um, at Heilsumiðstøðin í Runavík skal gerast ein Heilsudepil, og fyrsta stigið í hesum sambandi er at fáa tríggjar læknar í fast starv á deplinum.
Magnus Rasmussen vísir á, at síðsta summar gjørdu kommunurnar avtalu við Heilsumálaráðið um hetta, og hugskotið er at skipa eitt læknafakligt umhvørvi, har høvi eisini er til fakliga sparring.
- Haraftrat hugsa vit um aðrar heilsutænastur í deplinum, sum liggur beint við Apotekið í Runavík.
Borgarstjórin vísir á, at onkrar umbyggingar skulu gerast á Heilsumiðstøðini, so bygningurin veruliga kan gerast ein heilsudepil.
- Klárt er at søkja eftir triðja læknanum til depilin, leggur hann aftrat.
