Teir báðir Heri Jensen og Frants Vilhelm Jacobsen fingu í dag handað heiðursbræv fyri trúgva tænastu í Tórshavnar kommunu.
– Ótroyttiligir og í øllum veðri heinta teir burturkast upp í miðbýnum, sigur kommunan um teir.
Heri Jensen hevur síðani 1986 við eldhuga og nærlagni hildið býin reinan. Frants Vilhelm Jacobsen hevur gjørt tað sama síðani 2001.
– Teir hava trúfastir sópað gøtur og vegir fyri burturkast. Og soleiðis hava teir veitt sítt týðandi íkast til at fáa Havnina at skína. Eisini hava teir í virkseminum verið ein fyrimynd fyri onnur, sigur kommunan.
Mong eru tey, bæði ung og eldri, sum hava varnast miðvísa arbeiðið hjá Hera og Frants Vilhelmi.
– Áhaldandi arbeiðið hevur verið umhvørvinum og øllum havnarborgarum til gagns, segði býráðskvinnan Bjørg Dam, tá hon handaði teimum báðum heiðursbrævið.
Hon legði aftrat, at tað at rudda burtur rusk í gerandisdegnum hevur stóran týdning fyri umhvørvið, og arbeiðið hjá gøtusóparunum ger allar havnarborgarar tilvitaðar um umhvørvið.
##med2##
