Eirikur Lindenskov
Enn ein kanning frá Gallup Føroyum vísir á leið sama úrslit: Javnaðarflokkurin verður nógv størstur á býráðsvalinum í Havn í morgin.
Nýggjasta kanningin, sum er gjørd fríggjadagin, gevur Javnaðarflokkinum eina framgongd upp á 6,4 prosent, og tað gevur Javnaðarflokkinum seks umboð í Tórshavnar býráð.
Næststørstur verður Tjóðveldi, sum hevur eina framgongd upp á eitt lítið prosent. Flokkurin fær fýra umboð í Tórshavnar býráð.
Fólkaflokkurin stendur til at fáa ringasta valið í høvuðsstaðnum í 40 ár ? og fær sambært kanningini einans 17,1 prosent, sum er fimm prosentstig færri enn á seinasta býráðsvali fyri fýra árum síðani, og tað kostar flokkinum eins sess soleiðis, at Fólkaflokkurin fyri fyrstu ferð síðani á valinum í 1972 bara fær tvey umboð vald í Tórshavnar býráð.
Sambandsflokkurin stendur eisini til afturgongd. Sambært seinastu veljarakanningini fær flokkurin 10 prosent av atkvøðunum ? tað er ein afturgongd upp á 1,3 prosentstig í mun til seinasta val, og tað gevur flokkinum ein býráðslim.
Framsókn fær sambært hesi kanningini fimm prosent av atkvøðunum í høvuðsstaðnum. Og tað er ikki nóg mikið til at fáa umboð valt. Soleiðis sum atkvøðubýtið er sambært kanningini, so er sjeynda umboðið hjá Javnaðarflokkinum, fimta umboðið hjá Tjóðveldinum og triðja umboðið hjá Fólkaflokkinum framman fyri fyrsta umboðið hjá Framsókn. Men her eru marginalarnir smáir, og tí kann Framsókn saktans fáa umboð valt í býráðið, sum tann einasti av teimum smáu flokunum.
Miðflokkurin og Sjálvstýrisflokkurin hava heldur ikki í hesi kanningini nakran sum helst møguleika at fáa um boð vald í býráðið.
Tað eru sekstan ár síðani, at annar flokkurin, enn teir fýra stóru, høvdu umboð í Tórshavnar Býráð. Tað var, tá Ronald Poulsen varð valdur fyri Sjálvstýrisflokkin í 1996.
