Well. Spurningurin er, hvør er nóg góður javnaðarmaðøur. Heðin Mortensen plagar at siga, at hann var við til at stovna SU, ungmannafelagið hjá Javnaðarflokkinum. Og jú, tá vit spyrja, so var hann ein av teimum unglingunum, sum var møttu í Losjuni í Havn hendan 28. oktober í 1965, tá Sosialiskt Ungmannafelagið varð stovnað.
Heðin Mortensen varð valdur í Tórshavnar Býráð fyri Uttanflokkalistan hjá Petur í Gong í 1972. Sum navnið sigur, so var tað ein uttanflokkalisti við fleiri persónum, sum vóru organiseraðir í ymsum flokkum.
Í 1987 stillaði Heðin Mortensen upp fyri Sambandsflokkin til fólkatingsval, og árið eftir varð hann afturvaldur í Tórshavnar býráð – nú fyri Sambandsflokkin. Hann varð valdur á ting fyri Sambandsflokkin í 1998, og til valið í 2002 setti hann met við at fáa 399 persónligar atkvøður – uttan at verða valdur.
Við býráðsvalið í 2004 stóð Heðin Mortensen til at gerast borgarstjóri, men tað vildu floksfelagar hansara í Sambandsflokkinum ikki. Heðin Mortensen skipaði tí samgongu saman við Javnaðarflokkinum og Tjóðveldinum – og eftir at hann var koyrdur úr Sambandsflokkinum meldaði hann seg inn í Javnaðarflokkin. Á býráðsvalinum í 2008 setti Heðin Mortensen met við at fáa 2.200 persónligar atkvøður – og hann hálaði tríggjar aðrar býráðslimir við sær og gjørdi Javnaðarflokkin til størsta flokk í høvuðsstaðnum við fimm av 13 býráðslimum.
– So ja, hví skal Heðin Mortensen ikki bjarga Javnaðarflokkinum enn einaferð? Hann fekk Javnaðarflokkin frá 17 til 32 prosent. Tað er eingin sum sigur, at fyri tað um tað ber til í Havn, so ber tað til allastaðni. Men tað er stuttligt og kveikjandi, at ein persónur er so eldhugaður og brennir so nógv fyri eini søk, sum borgarstjórin í Havn ger. Men Suðurstreymoyar Javnaðarfelag skal skjóta onkran upp til formanssessin – og koma allir kandidatarnir úr Havn, so hevur felagið ein trupulleika...
