Øll tey føroysku feløgini, sum í summar hava roynt seg í europeisku kappingunum, eru liðug við altjóða luttøkuna í ár. Úrslitini vóru betri, enn tey sum oftast hava verið, og hóast einki føroyskt felag er eftir í europeisku kappingunum, so verður glansur framvegis kastaður yvir føroysku feløgini:
Fyri einari viku síðani var úrslitið 1-1, tá ið svenska Malmø FF og HB spældu í Gundadali.
Í kvøld hevur Malmø FF spælt fyrra dystin í triðja umfarinum. Svenska liðið var í Glasgow, har Rangers tók ímóti. Undan dystinum varð roknað við, at heimaliðið var upplagdur favorittur, men tað gekk øðrvísi, enn roknað varð við. Malmø FF vann 1-0. Málið skoraði Daniel Larsson í 18. minutti.
Sagt verður, at Malmø FF tað mesta av tíðini var leikliga omaná. Bæði hvat úrsliti og leikgongd viðvíkur ber tí til at siga, at HB stóð seg betri á heimavølli ímóti Malmø FF, enn Glasgow Rangers gjørdi.
Um eina viku verður í Malmø avgjørt, um tað verða Malmø FF ella Glasgow Rangers, sum fara at halda fram í kappingini.
