Fyrr í kvøld var talan um heilt stóra steypasensatión í Danmark, tá ið NFC í Nykøbing á Falster vann 3-0 ímóti FCK. NFC flutti í summar upp í næstbestu deildina, og FCK er størsta felagið í Danmark.
Í steypafótbólti lúrir sovorðin møguleiki altíð. Eisini inni í Dal á Sandi í kvøld, tá ið HB í fjórðingsfinaluni í kappingini um løgmanssteypið var gestur hjá B71.
Men talan varð als ikki um óvæntað úrslit, tí HB vann 5-0. Gestirnir høvdu leikliga yvirvág alla tíðina, men í fyrra hálvleiki eydnaðist tað bara at skora eitt mál, sum Stefan Radosavljevic skoraði í 18. minutti.
Jákup L. Thomsen átti uppleggið til 1-0 málið. Miðskeiðis í seinna hálvleiki skoraði HB fýra mál í 12 minuttir, og so endaði tað 5-0. Jákup L. Thomsen skoraði tvey mál í fimm minuttir og vísti, at hann av álvara er komin fyri seg eftir langan skaðasteðg. Michal Przybylski og Hørður H. Askham skoraðu hvør sítt mál.
Hjá B71 var einki at síggja til toppskjúttan Clayton Soares, sum ikki var á listanum í kvøld.
Bjarti Vitlis Mørk vardi HB málið, meðan Teitur Matras Gestsson sat á beinkinum. Millum hinar á beinkinum vóru Daniel Johansen, René S. Joensen og Mikkel Dahl, og so Adrian Justinussen og Bartal Wardum, ið vórðu skiftir inn í seinna hálvleiki.
Í hálvfinaluni skal HB spæla ímóti NSÍ. Hin hálvfinalan verður millum Víking og B36. Tað verður spælt soleiðis í hálvfinaluni:
20. november HB – NSÍ
21. november Víkingur – B36
27. november NSÍ – HB
28. november B36 – Víkingur
Finalan um løgmanssteypið verður leygardagin 4. desember.
B71 – HB 0-5 (0-1)
Fjórðingsfinala í kappingini um løgmanssteypið
0-1: Stefan Radosavljevic 18.
0-2: Jákup L. Thomsen 65.
0-3: Jákup L. Thomsen 70.
0-4: Michal Przybylski 73.
0-5: Hørður H. Askham 77.
Dómari: Rani A. Skaalum
B71: Klæmint Olsen – Klayver Nascimento, Alvi Jespersen, Brian Okpala, Marcus Clementsen, Gunnar Lydersen, Bogi Hentze, Joel Vazquez (Hans Oddson Hentze, 71.), Tijani Mohammed (Bjørgfinnur Winther, 78.), Suni Herman Petersen, Jonas Warner (Bogi J. Petersen, 78.)
Gult kort: Suni Herman Petersen
Venjari: Richard Goffe
HB: Bjarti Vitalis Mørk – Heri Hjalt Mohr (Bartal Wardum, 46.), Hørður H. Askham, Ási Dam – Pætur J. Petersen, Dan í Soylu, Stefan Radosavljevic (Lukas G. Giessing, 75.), Michal Przybylski – Hilmar Leon Jakobsen, Jákup L. Thomasen, Áki D. Samuelsen (Adrian Justinussen, 67.)
Gult kort: eingin
Venjari: Kevin Schindler
