Í samband við kappingarnar í Ódnartøkum verður eisini skipað fyri eini liðkapping millum róðrarfeløgini.
Ymisku róðrarfeløgini hava meldað lið til við trimum bátum í hvørjum liði, og vera stigini, sum bátarnir vinna á Ódnartøkunum, løgd saman. Síðani vera stig givin teimum liðunum, ið hava klára seg best.
Eftir fyrsta umfar, sum var róð í Havn flaggdagin, hevur høvuðsstaðurin lagt seg á odda í kappingini, men enn er sera tætt millum liðini.
Fremst liggur Knørrur við átta stigum, men beint í hølunum á teimum liggja Argja Róðrarfelag og Havnar Róðrarfelag við sjey stigum.
Í liðnum hjá Róðrarfelagnum Knørri eru dreingjabarnamanningin á Jallinum, kvinnumanningin á Jarnbardi og Ormurin Langi. Á liðnum hjá Argja Róðrarfelag eru báðar manningarnar á Teistanum og Drekin Reyði. Liðið hjá Havnar Róðrarfelag eru báðar barnamanningarnar á Sílinum og gentumanningin á Drekanum.
Síðani koma Fuglafjarðar Róðrarfelag og Hvalvíkar og Kollafjarðar Róðrarfelag við seks stigum hvør og Froðbiar Sóknar Róðrarfelag og Hósvíkar Róðrarfelag við fýra stigum hvør. Síðani kemur annað lið hjá Ròðrarfelagnum Knørrur og annað lið hjá Havnar Róðrarfelag við tveimum stigum hvør, Klaksvíkar Róðrarfelag við einum stigi og aftast Argja og Sandavágs Róðrarfelag við ongum stigi.
Endamálið við liðkappingini er at styrkja felagskensluna í hvørjum einstøkum róðrarfelag, eins og áhugan fyri, hvussu tað gongur hvørjum øðrum í sama róðrarfelag og harvið menna róðrarfeløgini sum heild.
