Havnarfeløgini hava nú møguleika at arga KÍ

Mikkjal Thomassen helt eftir 5-1 KÍ sigurin í Fuglafirði seinnapartin ikki, at talan hevði verið um meistaraavrik, og hann vildi á ongan hátt takka fyri FM lukkuynski.

-Nú eri eg á veg suður til Havnar. Vit hittast mánakvøldið til venjing í Klaksvík, og so ræður um at hava fokus á næsta dystinum. Í seinna hálvleiki ímóti ÍF var tað frægari, men í fyrra hálvleiki var tað ikki gott. Tað fingu spælararnir av álvara at vita undir steðginum, og eg haldi, at tað sást aftur í seinna hálvleiki, sigur KÍ venjarin Mikkjal Thomassen í samrøðu við Trónd Arge í FM1.

Um KÍ skuldi tryggja sær meistaraheitið í dag, so skuldi tað ganga upp í hægri eind soleiðis at skilja, at KÍ skuldi vinna í Fuglafirði, og at Víkingur skuldi ikki vinna í Sørvági. Víkingur legði seg á odda á Dungasandi, men 07 Vestur svaraði aftur. So var javnt, og KÍ var av álvara á FM kós, inntil Víkingur skoraði sigursmálið.

Seinnapartin í morgin spæla TB og HB útsettan landskappingardyst í Trongisvági.

Leygardagin verður 12. umfar, sum átti at havt verið spælt 23. mai. Tá varð bara dysturin millum NSÍ og KÍ spældur. Tí eru KÍ og NSÍ í dag farin í heystfrí frá landskappingini, meðan hini liðini skulu spæla leygardagin, áðrenn tey fara í heystfrí frá landskappingini.

Tað verður steðgur í landskappingini fram til leygardagin 16. oktober. Tað kemst av tí, at landsliðið skal spæla 9. oktober á heimavølli ímóti Eysturríki og 12. oktober á heimavølli ímóti Skotlandi. Fyrrapartin morgin fæst at vita hvørjar spælarar Håkan Ericson hevur boðsent at vera við í fyrireikingunum til landsdystirnar.

Víkingur er einasta liðið, sum hevur møguleika at fáa fatur á FM favorittunum í KÍ. Tað eru tólv stig frá toppinum og aftur til Víking. Málmunurin hjá KÍ er +85, og hjá Víkingi er málmunurin +31. Tí er tað neyðugt hjá KÍ at vinna stig í einum dysti aftrat fyri at tryggja sær FM heitið.

Tvær tær næstu ferðirnar skal KÍ spæla ímóti stóru feløgunum í høvuðsstaðnum. Leygardagin 16. oktober verður B36 gestur í Klaksvík, og mikudagin 20. oktober fara HB og KÍ í Gundadali at spæla útsettan dyst.

ÍF – KÍ 1-5 (1-2)

0-1: Árni Frederiksberg 18.

1-1: Emil Weihe Joensen 39.

1-2: Jóannes Bjartalíð br 43.

1-3: Jóannes K. Danielsen 60.

1-4: Børge Petersen 75.

1-5: Árni Frederiksberg 81.

B68 – NSÍ 0-1 (0-0)

0-1: Klæmint A. Olsen 64.

07 Vestur – Víkingur 1-2 (0-1)

0-1: Martin Klein Joensen 14.

1-1: Martin Tausen 63.

1-2: Gunnar Vatnhamar 80.

B36 – EB/Streymur 3-2 (1-2)

0-1: Gutti Dahl-Olsen 10.

0-2: Gutti Dahl-Olsen 23.

1-2: sjálvmál 38.

2-2: Hannes Agnarsson 67.

3-2: Alex Mellemgaard br 95.

TB – HB mánadagin kl. 15.30

Leygardagin 2. oktober

Víkingur – EB/Streymur

B68 – 07 Vestur

B36 – HB

TB - ÍF