Fyribrigdi
Bogi Hansen, havfrøðingur, sigur, at hann hoyrdi um løgna fyribrigdið í Hvannasundi, tá fólk haðani ringdu til hansara seint mikudagin og søgdu frá tí, tey høvdu sæð.
Havfrøðingurin er fyribils av somu áskoðan, sum Lis Mortensen, jarðfrøðingur, sum segði við Dimmalætting í gjár, at talan helst hevur verið um okkurt omanlop.
- Tað er torført at siga, hvat kann vera hent, so leingi vit ikki vita nakað við vissu, men eg giti mær til, at eitt hvørt er farið fram á landi ella á botni, sigur Bogi Hansen.
Eisini aðrastaðni
Líkt er til, at fyribrigdið, sum hendi í góðveðrinum í Hvannasundi seinnapartin mikudagin, í ein ávísan mun eisini hevur verið at sæð eitt nú á Árnafirði og Klaksvík.
Jógvan Ziska Dahl, havnafúti í Klaksvík, sigur við Dimmalætting, at knappliga eina lítla løtu hendan sama dagin var fjøra í Klaksvík, tá tað annars skuldi verið flóð. Samstundis var sjógvurin gruggutur.
Á Árnafirði súðaði eisini, men Árnafjørður er breiðari enn Hvannasund. Kortini øktist vatnstøðan ein metur um somu tíð, sum fyribrigdið var í Hvannasundi, har munurin á hægstu flóð og lægstu fjøru var einar 2,5-3 metrar.
Einki av ongum
Í samrøðu við Dimmalætting sigur Tóri Simonsen, sum seinni hetta mikukvøld var í báti á Hvannasundi, at tá fór aftur at súða, men kortini ikki so ógvusliga sum fyrr um dagin.
Tóri heldur, at tað, sum hendi hendan dagin, má hava havt okkurt við sjóvarfall at gera.
Bogi Hansen, havfrøðingur, dugir ógvuliga illa at ímynda sær, at fyribrigdið kann hava havt nakað við sjóvarfall einsamalt at gera.
- Veðrið var gott, og streymurin góður. Havið ger einki uttan so, at tað verður ávirkað av øðrum viðurskiftum. Havið flytir seg ikki av sær sjálvum, sum hann tekur til.
Havfrøðingurin leggur dent á, at tað er sera torført at meta um, hvat tað var, sum hendi, fyrr onkur orsøk kemur undan kavi – so ella so.
