Á teimum 18. oyggjaleikunum í Gibraltar megnaðu Føroyar at hála seg uppum 700 oyggjaleikaheiðursmerki á tí søguliga heiðursmerkja-yvirlitinum.
Føroyar vunnu 22 gullheiðursmerki, 11 silvurheiðursmerki og 27 bronsuheiðursmerki á oyggjaleikunum í Gibraltar. Hetta gevur Føroyum eitt triðja pláss á heiðursmerkjayvirlitinum. Jersey vinnur oyggjaleikirnar við 33 gull, 31 silvur og 29 bronsu. Oyggin Man er nummar tvey við 29 gull, 22 silvur og 17 bronsu.
Søguliga hava Føroyar síðani fyrstu oyggjaleikirnar á Oynni Man í 1985 vunnið 232 gullheiðursmerki, 211 silvurheiðursmerki og 264 bronsuheiðursmerki.
Føroyar hava sostatt á 18 oyggjaleikum gjøgnum 34 ár vunnið 707 oyggjaleikaheiðursmerki.
Fyrstu oyggjaleikirnir nakrantíð vóru á Isle of Man í 1985. Í 1985 gjørdist Elmar Ósa føroysk fólkahetja, tá hann vann fyrsta føroyska oyggjaleikaheiðursmerkið nakrantíð. Elmar var næstskjótasti svimjarin á einum so løgnum teini sum 66 2/3 metrum. Ein teinur sum ikki hevði komið fyri á oyggjaleikum í dag.
Komandi oyggjaleikirnir vera á ermasundsoynni Guernsey. Fyrireikararnir vænta, at heili 3.000 ítróttarfólk fara at kappast á oyggjaleikunum á sumri í 2021, ið er eitt metstórt tal av ítróttarfólki.
