Uppruddingarliðini hava fingið tamarhald á oljuni, sum lekur frá Olshanu, eftir at oljubyrgingar og oljusúgvandi verjur eru lagdar kring staðið, har vrakið liggur. Oljan, sum lekur úr Olshana, er avbyrgd og verður tikin upp, so hvørt hon flotnar upp í vatnskorpuna, siga innlendismálaráðið, Tilbúgvingarstovnurin og Herilsufrøðiliga Starvsstovan í morgun.
Uppruddingarliðini hava sostatt tamarhald á seyrandi oljuni, eftir at Tjaldrið fyrradagin legði 400 metrar av havgangandi oljubyrgingum kring staðið, har Olshana liggur. Innanfyri eru lagdar oljusúgvandi verjur, sum beinanvegin taka oljuna, ið seyrar úr skipinum.
Ein standby-bátur frá OSR Faroes heldur støðugt vakt við oljubyrgingarnar fyri at tryggja, at byrgingarnar verða liggjandi, og at fullar oljuverjur verða tiknar inn.
Meira basingarútgerð er eisini komin til landið við einum Hercules-flogfari hjá danska flogvápninum. Mett verður, at nú er nóg mikið av útgerð í landinum at taka olju upp av sjónum. Í løtuni verður olja tikin upp við grótkastið á Oyri og einstakar oljusúgvandi verjur liggja á Morskranesi og Selatrað.
Í dag verða fleiri kanningar gjørdar av vrakinum við upptøkutóli. Eisini er Landsverk biðið um at gera eina scanning av botninum á vrakstaðnum og Náttúruvísindadeildin er umbiðin at gera streymkanningar.
Ein serfrøðingur úr norska ?Kystverkets Beredskapsafdeling? er komin til Føroya at ráðgeva føroysku myndugleikunum í sambandi við uppruddingarátakið.
