- Vit ætla at kanna 1000 føroyingar.
Tað er málið, nú Fólkaheilsuráðið er farið á rundferð kring landið at kanna fólk, sigur Ólavur Jøkladal, kunningarleiðari á Fólkaheilsuráðnum.
Eitt høvuðsendamál við átakinum, sum ber heitið, Heilsa á Ferð, er at finna fólk, sum hava diabetis, uttan at vita av tí.
Gransking bendir á, at einir 1000 føroyingar hava diabetis, uttan at vita av tí.
Avleiðingin av tí er, at fólk kunnu ganga í áravís, uttan at sjúkan verður viðgjørd.
Sukursjúka er álvarsom sjúka og tí er avgerðandi, at fólk, sum hava diabetis, verða sett í viðgerð, sum skjótast.
Eitt annað høvuðsendamál er at finna fólk við roykjaralungum. Royking er ein stór atvold til roykjararlungu, men sjúkan kann eisini hava aðrar orsøkir.
Ólavur Jøkladal sigur, at higartil hava tey kanna 463 fólk í Klaksvík, Eysturoy og í Havn.
- Í hesum kanningum hava vit funnið fólk við vekum lungum og har vit hava mælt teimum til at fara til lækna.
- Vit hava eisini funnið fólk, sum høvdu diabetis, uttan at vita av tí og teimum hava vit so eisini mælt til at fara til lækna.
- Harafturat hava vit eisini funnið fólk, sum hava diabetis á undanstigi og sum sostatt eru í ferð við at fáa diabetis.
- Teimum mæla vit til at lata seg kanna einaferð um árið, sigur Ólavur Jøkladal.
Kanningar eru í Havn hesa vikuna og alla næstu viku.
Kanningarnar eru serliga ætlaðar fólki yvir 35 og sum røra seg lítið, viga ov nógv, roykja, ella hava roykt, og tað er neyðugt at melda seg til hjá Fólkaheilsuráðnum.
Seinni er so eisini ætlanin at fara í Sandoy, til Suðuroyar og vestur í Vágar at kanna fólk.
