Frá 1. oktober til og við 20. januar er loyvt at skjóta lomvigu, álku og lunda, og frá 1. oktober til og við 30. november er loyvt at skjóta skarv.
Nú eru føroyingar ikki so raskir við hagtølum, tá ræður um fuglaveiði, sum vit annars hava verið í øldir við hagtølum um fiski-og grindaveiði. Tey, sum skjóta, hava onga fráboðanarskyldu, og tískil eru eingi neyv hagtøl yvir svartfuglaveiði.
Hyggja vit á Facebooksíðuna – Fuglaveiða í Føroyum – liggja her onkrar frásagnir frá túrum nú í heyst, síðan loyvt varð at skjóta lomvigu, álku og lunda.
Sagt verður frá túri hjá monnum, sum ein dag fingu upp í 200 fuglar norðan fyri, og í einum øðrum føri er sagt frá túri í hesi vikuni, har menn á einum báti fingu 102 fuglar.
Ein annar maður, sum viðmerkir á Facebook-síðuni, sigur seg hesa vikuna hava gjørt ein túr, sum gav 88 fuglar – og enn ein maður, sum var einar 17 fjórðingar úr landi eystan fyri, hevði 37 fuglar.
Nú oktober mánaði líður móti endanum, og veðrið er vorðið meira óstøðugt, skal tað helst vera ein góður dagur til veður, sum fær menn at loysa frá landi til eina slíka veiðiferð.
Soleiðis, sum sagt verður á Facebook-síðuni – Fuglaveiða í Føroyum – skilst, at menn sum heild hava verið langt úr landi, og tað krevur gott veður, tá so langt er útliðið.
Svartfuglur sum lomvigi og álka er sera góður og vælsmakkandi matur, og tá loyvda veiðitíðin er avmarkað, er hetta eisini sera forkunnugur matur á døgurðaborðinum.
Kjak hevur áður verið á síðuni – Fuglaveiða í Føroyum - um veiðan eftir lomvigu og álku kanska skuldi havt eitt hámark í tali av fugli fyri hvørja veiðiferð. Men, ymiskar meiningar hava verið um hetta, sum sjálvsagt eisini er væntandi.
