Hava bara valt 25 kvinnur á ting

Hóast valrætt í 100 ár, so hava føroyingar tilsamans bara valt 25 kvinnur á ting. Og bara 14 kvinnur hava sitið í landsstýrinum. 6 kvinnur hava havt sæti á tingi sum eykafólk fyri landsstýrisfólk.

Tað tók føroyingum 62 ár frá tí at kvinnur í apríl 1916 fingu valrætt og valbæri, til fyrstu kvinnurnar vórðu valdar á ting í 1978.

Tað hendi á løgtingsvalinum 7. november í 1978, tá Jona Henriksen úr Javnaðarflokkinum og Karin Kjølbro úr Tjóðveldisflokkinum vórðu valdar á ting í Suðurstreymoyar valdømi.

Jona Henriksen hevði sitið á tingi valskeiðið frammanundan. Hon stillaði upp til løgtingsvalið í 1974 og fekk næstflestar atkvøður, men tók sæti á tingi fyri Jákup Lindenskov, sum helt fram í landsstýrinum eftir valið í 1975.

Fyrsta kvinna, sum hevur møtt á tingi var Malla Samuelsen úr Sjálvstýrisflokkinum, sum kom inn nakrar dagar í 1964 sum eykafólk fyri Marius Johannesen.

Í dag eru 100 ár síðani seinasta løgtingsval, tá kvinnur ikki kundu stilla upp. Frá 1906 til 1916 varð løgtingsval hildið annaðhvørt ár upp á skift sunnanfjørðs og norðanfjørðs. Frá valinum í 1918 var hetta broytt til, at løgtingsval var um alt landið í senn.

Kvinnur sluppu fyri fyrstu ferð at velja á valinum í 1916. Úrslitið av løgtingsvalinum í 1918 var, at Sjálvstýrisflokkurin fyri fyrstu ferð vann á Sambandsflokkinum. 20 mans vóru valdir á ting, 11 sjálvstýrismenn og 9 sambandsmenn.