Toppskjúttin í Premier League frá í fjør, Harry Kane, átti enn síni fyrstu mál til góðar hetta kappingarárið, undan truplu uppgerðini hjá Tottenham móti Everton í dag.
Men í dag bragdaði tað hjá vandamikla enska áleyparanum. Harry Kane skoraði ikki færri enn tvey mál, tá Tottenham vann 3-0 á útivølli móti Everton. Hitt málið hjá Tottenham skeyt danski stjørnuspælarin, Christian Eriksen, sum hevur fingið eina flúgvandi byrjan uppá kappingarárið í Premier League.
Av øðrum dystum í Premier League, var mest áhugaverdi dysturin á King Power leikvøllinum í Leicester, har meistararnir frá í fjør og fyrraárið hittust. Tann dystin vann Chelsea 2-1, eftir at teir høvdu verið á odda 2-0.
Arsenal, sum seinast fekk bank á útivølli móti Liverpool, fekk í dag uppreisn, tá teir á heimavølli vunnu 3-0 móti Bournemouth. Hjá Arsenal skeyt Danny Welbeck tvey mál, meðan Alexandre Lacazette skoraði hitt.
Seinasti dysturin í Premier League í dag verður spældur klokkan 17:30, tá Stoke á heimavølli tekur ímóti Manchester United
Úrslitini í Premier League í dag:
Manchester City – Liverpool 5-0
Arsenal – Bournemouth 3-0
Brighton – West Bromwich 3-1
Everton – Tottenham 0-3
Leicester – Chelsea 1-2
Southampton – Watford 0-2
