Fríggjadagin, tá Fiskamarknaður Føroya gjørdi sínar metingar fyri næstu viku, var bara eitt línuskip á ísfiskaveiðu.
- Skipið fiskar undir Íslandi og kemur helst inn at landa mikudagin. Veiðan er ein blandingur av toski, longu og brosmu og helst eru eisini nakrar hýsur.
Væntandi er, at línuskipini fara avstað aftur, tá veður og streymur verða til vildar.
- Tvey frystilínuskip eru til fiskiskap undir Føroyum, og tey fáa mest av longu og brosmu.
Um útróður, sigur marknaðurin, at streymurin er harður, men batnar út á vikuna.
- Veðrið verður ikki nakað serligt hesa vikuna, og tí vænta vit ikki tann heilt nógva útróðurin. Heilt einki verður tó neyvan, sigur Fiskamarknaður Føroya.
Lagt verður aftrat, at útróðrarbátarnir fáa mest av toski og hýsu.
