Harðskapur í familjuni kostar samfelagnum minst fimm milliónir um árið.
Tað upplýsir Johan Dahl, landsstýrismaður í vinnumálum, nú fíggjarlógin fyri næsta ár er til viðgerðar.
Sum vit hava skrivað á Portalinum fyrr í dag, í greinum, sum eru viðfestar hesari, hevur ætlanin verið at gera eina fimm ára heildarætlan fyri at fyribyrgja harðskapi í parløgum og nærsambondum.
Ætlanin er at brúka 1,2 million til endamálið í ár, men nú ætlar fíggjarnevndin at skarva av játtanini.
Tað mælir landsstýrismaðurin í vinnumálum staðiliga frá, tí hann staðfestir, at verður skarvað av ætlanini, fer heildarætlanin fyri skeytið.
Og tað heldur hann hevði verið eitt stórt bakkast.
Í hesum sambandi vísir hann á, at ein meting sigur, at harðskapur í familjuni kostar samfelagnum minst fimm milliónir krónur um árið.
Hetta eru útreiðslur til læknaviðgerð, útreiðslur í heilsuskipanini annars, útreiðslur til kreppumiðstøðir, løgregluviðgerð og mista arbeiðsinntøku.
Men í hesi uppgerðini eru útreiðslurnar av at viðgera børn, ikki taldur við.
Útreiðslurnar av at taka hond um langtíðartrupulleikar hjá teimum, ið eru rakt av harðskapi, eitt nú sálarligir trupulleikar og innlegging á psykiatrisku deild, eru heildur ikki taldir við.
