-Uppskotið hevur ógvuliga stórt signalvirði, og tað er týdningarmikið hjá tinginum at vísa, at vit sum land góðtaka ikki harðskap ímóti børnum. Hetta heldur Finnur Helmsdal, sum er løgtingsmaður fyri Tjóðveldisflokkin, sosialráðgevi og leiðari fyri Barnaheimið.
? Likamligur harðskapur er ikki bara likamlig revsing. Tað er eisini ein sálarlig revsing. Tá ein stórur og sterkur persónur slær eitt barn, so snýr hetta seg eisini um sálarligan ágang. Eitt tað mest niðurgerandi tú kanst gera ímóti einum barni er, at tú nýtir tína stødd og vekt ímóti tí, sigur Finnur Helmsdal.
Hann sigur, at tað snýr seg um at vísa virðing og kærleika ímóti barninum, og føroyingar eiga ikki at tilskila sær rættin til at tulka, hvat hetta merkir. Kærleiki er ikki ein brestur í afturpartin, men heldur orð, sum kunnu menna børnini sálarliga, heldur Finnur Helmsdal.
Finnur Helsmdal tekur fult undir við uppskotinum hjá Javnaðarflokkinum um, at tað skal gerast ólógligt likamliga at revsa børn.
? Harðskapur avmarkar børn sálarliga. Tað er avgerandi fyri eitt barn, hvat viðføri tað fær víðari, og her er tað sálarliga ógvuliga týdningarmikið.
Taparin
? Harðskapur er eitt armóðstekin. Hendrik Old segði á tingi mikudagin, at tað er tann, sum slær, sum hevur tapt, men tað er sanniliga eisini tann, sum verður sligin, sum hevur tapt, greiðir Finnur Helmsdal frá.
Orsøkirnar kunnu vera fleiri. Jenis av Rana, tingmaður, segði, at orsøkin var sum oftast rúsdrekka, men heldur Finnur Helmsdal, at raðfestingin í dagligdegnum hevur eisini nógv at siga.
? Hvussu raðfesta vit børnini í gerandisdegnum? Tað snýr seg um, í hvønn mun vit eru saman við børnunum, og hvat vit gera saman við teimum. Orsøkin er í teimum dagligu viðurskiftunum, og tað er har vit skulu fara inn, sigur løgtingsmaðurin.
Finnur Helmsdal mælti mikudagin rættarnevndini til, at tingið skal senda eitt signal út.
? Vit eiga at vísa umheiminum, at Føroyar taka ikki undir við, at tað er rætt at sláa børn, segði Finnur Helmsdal at enda.
