Jan Christiansen, býráðslimur
Bæði Heðin Mortensen og Jógvan Arge vóru skjótir við penninum, nú minnilutin í Tórshavnar Býráð vildu varðveita verandi skattaprosent og lata borgarunum ein skattalætta komandi ár.
Veruligi borgarstjórin í Tórshavn, Jógvan Arge, kallar minnilutan fyri heintar sprellimenn, ímeðan hin borgarstjórin, Heðin Mortensen, sigur, at bæði Beate L. Samuelsen og undirritaði ikki hava skilt nakað sum helst.
Jógvan er skilagóður, útspekuleraður og dugur væl at skriva, so kanska vit í minnilutanum skuldu tikið tað at okkum, tá hann kallar okkum heintar sprellimenn, men lat fara. Heðin er Heðin, so er tað sagt!
Tey lágløntu
merkja sviðan
Men aftur til mista skattalættan. Landsskatturin lækkar komandi ár, og eru tað serliga lág- og miðalinntøkurnar, ið skulu merkja skattalættan. Landsskatturin er progressivur og tað ger, at láginntøkur gjalda minni part av lønini í skatti enn tær høgu inntøkurnar. Kommunuskatturin er hinvegin ein javnur skattur. T.v. s. at sami prosentpartur verður tikin av lønini til skatt av eini lágari løn sum av eini høgari løn. So við at flyta eitt prosent av landsskatti til kommunuskatt, vilt tú raka tey lágløntu serliga meint.
Nú meirilutin í Tórshavnar Býráð hevur hækkað skattaprosentið vilja hesi lágløntu serliga merkja sviðan av hækkingini. Fólkaflokkurin og Sambandsflokkurin vóru ímóti at hækka kommunuskattin, men Tjóðveldisflokkurin og Javnaðarflokkurin, ið hava meirilutan í býráðnum, vildu hinvegin hava kommunuskattin hækkaðan við einum prosenti.
So Heðin Mortensen, sum í løtini er altvitandi javnaðarmaður, hevur við skattahækkingini lagt eyka byrðar á tey lágløntu. Kanska var hækkanin av kommunuskattinum partur av skránni á landsfundinum hjá Javnaðarflokkinum inni á Svangaskarði herfyri.
Ein sannroynd er, at Tórshavnar Kommuna er sera væl fyri fíggjarliga, og við skynsamari fíggjarstýring kundu vit lættliga varðveitt verandi skattaprosent komandi ár.
