Tað verður Hans Jørgensen, sum í kvøld fer at standa millum stólparnar í EB/Streyma málinum, tá ið sundalagsmenn í Klaksvík fara at spæla útsetta dystin frá sunnudegnum ímóti KÍ.
Tað váttar Sigvald Zachariassen, formaður í EB/Streymi, nú teir eru savnaðir við Margáir og gera klárt at fara til Klaksvíkar.
EB/Streymur er í akuttum málverjutrupulleikum. René Tórgarð, sum nógvu tey seinnu árini hevur verið tryggur aftasti skansi, hevur síðstu vikurnar verið skaddur, og hann er ikki komin fyri seg enn. Talan er um vøddaskaða í tjúkkanum, og tað verður vónað, at málverjin verður førur fyri at spæla aftur um einar tvær vikur.
19 ára gamli Jákup Andrias Hansen hevur vart EB/Streyma málið tvær tær seinastu ferðirnar. Orsaka av sjúku hevur hann ikki vant seinastu dagarnar, og nú hevur EB/Streyma leiðslan syrgt fyri, at Hans Jørgensen skal verja málið í kvøld.
Flytingarvindeygað er afturlatið, men í sovornum føri sum hesum, tá ið eitt felag ongan málverja, hevur, verður undantak givið.
Í fjør vardi Hans Jørgensen málið hjá B68. Hann stóð seg so mikið væl, at Lars Olsen landsliðsvenjari boðsendi honum at vera við á venjingarleguni í Thailandi fyrr í ár. Nú spælir Hans Jørgensen í HB, har hann kappast við Teit M. Gestsson um plássið millum stólparnar. Í fyrstu atløgu hevur Hans Jørgensen tapt ta kappingina. Oddbjørn Joensen, venjari í HB, heldur seg at hava tveir javntgóðar málverjar, men higartil hevur Hans Jørgensen bara spælt í 1. deild.
Í kvøld fær Hans møguleikan í fremstu røð at vísa, hvør dugur er í honum.
Hjá EB/Streymi eru allir spælararnir tøkir uttan Gunnar Zachariasen, sum er leikbannaður fyri triðju og síðstu ferð í hesum umfarinum. Levi Hanssen kom fyri tveimum vikum síðani heim aftur, og hann verður á EB/Streyma liðnum í kvøld.
KÍ hevur seinastu dagarnar vant á Svangaskarði, tí kavi hevur verið á vøllinum í Klaksvík. Liðformaðurin, Hjalgrím Elttør, hevur orsaka av sjúku ikki luttikið í venjingunum, men hann verður við í kvøld.
Tað er stevnuhýrur og gott veður í Klaksvík, og hóast tað er eitt sindur kølið, so verður roknað við nógvum áskoðarum, tá ið Lars Múller klokkan 17.30 fer at bríksla fyri fyrstu ferð.
