- Har var lítið at gera. Tað er stutta og greiða niðurstøðan hjá Hans J. Hermansen, nevndarlimi í Grindamannafelagnum. Sea Shepherd hevur fingið skotska sjónleikaran, Ross McCall at hjálpa sær at mótmæla grindadrápi í Føroyum og hetta høvi brúkti Grindamannafelagið til at fáa fund í lag við skotan at greiða honum frá okkara støðu.
Les eisini: Eg vóni, tú virðir okkara søgu og mentan
- Vit høvdu eitt gott og siðiligt prát í gjár. Fndurin okkara millum vardi hálvan annan tíma. Prátið var virðiligt og vit tosaðu um mangt og hvat, sigur Hans J. Hermansen. Men hann staðfestir samstundis, at hvat grindini viðvíkur, er skotin so frestur í trúnni, at har var einki at gera. - Í Spurninginum um grind var hann ikki til at vika, sigur nevndarlimurin í Grindamannafelagnum. - Vit vóru samdir um at vera ósamdir um grindadráp, sigur hann
Sjálvur etur Ross McCall ikki kjøt og hann er ímóti at drepa dýr yvirhøvur. - Hann vardi seg við, at hann er ímóti at dýr verða dripin yvirhøvur til mannaføði. Men hann er serliga eymur um hvalin, sum hann sigur, hava størri heila enn onnur dýr og sostatt eisini eru klókari enn onnur dýr. Og hann heldur, at tað hoyrir ikki heima í 2014, at hvalir vera dripnir.
- Eg fekk sagt honum eitt sindur um Føroya søgu og um føroyska mentan, og so tosaði vit eisini um eitt sindur við politikk, nú skotar skjótt skulu hava fólkaatkvøðu um sína politisku framtíð, sigur Hans J. Hermansen.
- Eg gav honum eisini bókina "Pilot Whaling in the Faroe Islands" eftir Jóan Paula Joensen.
Les eisini: Ross fekk vitan um grindadráp
Hans J. Hermansen sigur, at bæði Sea Shepherd og Grindamannafelagið tóku allan fundin upp, so skuldi umhvørvisfelagsskapurin funnið upp á at snara boðskapinum á fundinum, kann Grindamannafelagið mótprógva tí.
- Ross McCall dámdi væl í Føroyum og vónaði at hann fekk høvið at vitja aftur og tá kann hann kanska fáa eina betri fatan av Føroyum og føroyingum, heldur grindamaðurin.
Niðanfyri eru fleiri myndir frá fundinum ímillum Hans J. Hermansen og Ross McCall
|
