Í sambandi við, at Helena Dam á Neystabø hevur tikið sæti á Løgtingi, hevur hon fingið farloyvi úr stjórastarvinum á Føroya Handilsskúla.
Og í hesum sambandi er Steinbjørn Hardlei settur sum fyribilsstjóri á Handilsskúlnum og hann tekur við fríggjadagin. Starvið er annars tíðaravmarkað fram til 01. Januar 2017.
Steinbjørn Hardlei er útbúgvin cand. oecon í virkisbúskapi við serligum denti á strategi, starvsfólka- og broytingarleiðslu. Hann hevur harumframt tikið altjóða leiðaraútbúgving í broytingarleiðslu við denti á virkissálarfrøði og fyriskipan.
Hann hevur annars hollar royndir sum leiðari, bæði sum starvsfólkaleiðari og rakstrarleiðari, í nøkrum av teimum størstu føroysku fyritøkunum.
Hann hevur staðið á odda fyri fleiri stórum broytingartilgongdum, har samanleggingar hava verið partur av tilgongdini. Steinbjørn hevur eisini drúgvar undirvísingarroyndir og undirvísir í løtuni á Føroya Handilsskúla á teimum hægru útbúgvingunum og á Búskaparbreytini.
Umframt at hava ábyrgd av dagliga rakstrinum á Føroya Handilsskúla, skal stjórin vera við til at leggja til rættis samanleggingina av Føroya Handilsskúla, Tekniska Skúla og Føroya Studentaskúla, í skúladepilin í Marknagil.
