Hósdagin skipar Tórshavnar kommuna fyri almennari samkomu í Müllers Pakkhúsi í samband við, at Mentanarvirðislønir M.A. Jacobsens verða latnar.
Í tíðindaskrivi verður boðað frá, at tríggjar virðislønir verða latnar í ár. Ein fyri fagurbókmentir, ein fyri yrkisbókmentir og ein fyri mentanaravrik.
Fyrstu bókmentavirðislønir M.A. Jacobsens vórðu latnar í 1958 og frá byrjan vórðu ein ella tvær virðislønir latnar. Eftir 1972 skuldi onnur virðislønin latast yrkisbókmentum og hin fagurbókmentum. Frá 1985 bar eisini til at lata virðisløn fyri mentanaravrik, og nevndin fekk heimild til ikki at lata onkra av virðislønunum.
Limir í nevnd M.A. Jacobsens frá 2012 og fýra ár fram eru Erling Isholm, Jákup Jacobsen og Heri Ólason Dam, vald av býráðnum, Vár í Ólavsstovu fyri Rithøvundafelagið og Malan Marnersdóttir fyri Fróðskaparsetrið.
