Skálavík: - Vit eru beint nú í ferð við at seta sperrurnar upp í hesum summarhúsinum, sigur Johannes Kristensen av Sandi.
- Vit ætla, at tey verða innilokað í hesi vikuni!
Hann starvast sum handverkari og altmuligmand hjá fyritøkuni “Multitænastan” á Sandi, sum serliga hevur lagt seg eftir at gera smærri og størri arbeiðir á Sandoynni.
Teirra styrki er, at viðskiftafólkini verða tikin við upp á ráð, áðrenn eitt arbeiði verður sett í verk.
Kemur ein við eini tekning til eini hús, so verður henda gjøgnumgingin, onkur broyting verður kanska gjørd í tekningini, soleiðis at besta úrslitið fæst burturúr.
- So gera vit tað sum tey ynskja, og laga okkum eftir hvørjum øðrum, greiðir hann frá.
Hann og ein annar maður eru til arbeiðis í Skálavík beint nú. Her er talan um eitt øki sum er avsett til summarhús. Pláss er fyri seks húsum, og eru teir í løtuni í ferð við fjórða summarhúsið á økinum.
3-4 mánaðir aftrat
Johannes Kristensen arbeiðir hjá Multitænastuni, og sum navnið so greitt sigur, veitir fyritøkuna tænastu á mongum økjum.
Teir gera vanligt timburarbeiði, teir leggja flísar á hjá fólki, stoypa, grava, leggja kloakk, mála og tapetisera fyri kundar, men bert á Sandoynni.
Teir hava haraftrat átikið sær ymisk størri arbeiði. Í fjør smíðaðu teir eini hús fyri ein kunda heima á Sandi. Og nú eru teir so í ferð við eini onnur hús miðskeiðis í Skálavík - á tí tey nevna Oyravegnum.
Her er talan um eini hús sum Starvsmannafelagið letur byggja. Teir byrjaðu uppá arbeiðið fyri lítlum mánaði síðani, eftir at aðrir høvdu planerað grundøkið.
- Vit eru tveir mans til arbeiðis í dag. Og gongst soleiðis sum vit ætla, fer tað at taka einar 3-4 mánaðir aftrat, greiðir Johannes íðin frá.
Multitænastan skal somuleiðis mála og tapetisera innan. So tá teir eru lidnir við sítt arbeiði, kann felagið fáa handaðan lykilin til hesi snotuligu húsini.
- Vit hava eitt sindur at gera, men tað er kortini so mikið at vit klára okkum!
Barnavinarligt umhvørvi
Tá Sosialurin vitjaði í Skálavík týsdagin vóru Johannes og ein annar maður í holt við at seta sperrurnar upp.
Her er sum nevnt talan um eini summarhús hjá Starvsmannafelagnum, og húsini eru tí innrættað á bestan hátt til at røkka hesum endamáli.
Húsini eru í tveimum hæddum. Í niðaru hæddini verða køkur og stova í einum, trý kømur, fýrrúm og gangur.
Men í ovaru hæddini verður ein hemsur, ið kann nýtast til ymisk endamál, alt eftir hvat tørvurin nú einaferð verður.
- Hesin hemsurin verður helst eitt fínt stað hjá børnum at spæla inni í, sigur hann brosandi.
Hinvegin liggur hetta summarhúsið sera væl fyri í landslagnum: Tað liggur nakað burtur frá vegnum, men er kortini niðri í sjálvari bygdini, í nánd av øðrum summarhúsum.
Er veðrið til vildar, ber væl til hjá børnunum at spæla sær í ánni sum rennur beint framvið. Ella tey fara niðan á fótbóltsvøllin við bygdarskúlan, ið bert liggur eitt lítið hanagleiv frá summarhúsinum.
Eitt ynski frá felagnum var, at øll skuldu kunna nýta húsini, óansæð likamligan førleika.
- Vit fara tí at gera eina rampu, soleiðis at fólk, sum eru illa gongd, eisini kunnu gera brúk av teimum, sigur Johannes Kristensen.
Sól og frost
Tá slík arbeiðir eru í gongd her á landi, er spurningurin altíð, hvussu er við veðrinum og ta ávirkan, sum hetta hevur á tíðarætlanina fyri byggingini.
Sigast kann, at teir hava verið rættiliga hepnir við veðrinum. Allar dagarnar í hesi vikuni hevur viðrað av tí allarbesta, - eisini týsdagin, tá Sosialurin vitjaði í Skálavík.
- Jú, veðrið hevur verið sera gott, eisini í síðstu viku og tá vit forskallaðu. Men tá vit stoyptu fundamentið, tá kom frostur á okkum. Tá máttu vit dekka alt til, so tá steðgaði arbeiðið eitt sindur upp, greiðir hann frá.
- Men tað tók kortini ikki skaða av tí, sigur Johannes Kristensen.
Ein multi-maður
- Ein skal duga mangt og hvat, tá ein arbeiðir hjá Multitænastuni, sigur Johannes Kristiansen við einum brosi.
Sjálvur er hann útbúgvin sum - halt tær nú fast - landbúnaðarmaskinmekanikari, sum tað eitur á hampiliga góðum føroyskum máli. Ella í stuttari útgávu: traktormekanikari.
Hann kom til Føroyar í síni tíð sum húskallur hjá einum bónda heima á Sandi. Hetta var í 1994, og arbeiddi hann fyrst eitt ár í fjósinum. Síðani hevur hann m.a. arbeitt í smiðjuni hjá Statoil og hjá J&K Petersen, har hann sigldi við flakanum “Borarin” í tvey ár.
- Eg kom tá suður aftur til Sands, og byrjaði hjá Multitænastuni, greiðir Johannes Kristiansen frá.
- So skilir, at eg havi prøvað eitt sindur av hvørjum!
Samstarv við aðrar
Multitænastan hevur nøkur ár á baki, men longu í dag finnast prógv fyri teimum arbeiðunum sum teir hava staðið fyri.
Sum nevnt bygdu teir eini sethús heima á Sandi í fjør. Umframt hetta arbeiðið, tóku teir eisini yvirtromina av einum øðrum húsum, reistu tey og løgdu nýtt tak á.
Eitt annað spennandi samstarv er fingið í lag við fyritøkuna Norðsetur í Hvalvík, sum bæði átekur sær stórar uppgávur og smáar.
Her í Sandoy hevur Multitænastan virkað sum undirveitari av tænastum hjá hesi størri fyritøkuni.
- Vit innrættaðu trý hús fyri teir í fjør, sigur Johannes.
Óhugsandi er ikki, at okkurt annað arbeiði liggur og bíðar, tá hetta arbeiðið í Skálavík er liðugt.
