Hallur Hansson fekk 62 minuttir á vøllinum, tá hann og liðfelagarnir í KR taptu greitt 0-4 fyri oddaliðnum, Breiðablik á útivølli í Kópavogi í bestu íslendsku fótbóltsdeildini í kvøld.
Úrslitið ger KR órætt, tí KR hevði eins nógvar málmøguleikar sum Breiðablik. Men Breiðablik er ikki greitt oddalið fyri einki. Teir duga væl at taka av sínum málmøguleikum, og tað gjørdu teir aftur í kvøld. Breiðablik skoraði tvey mál í fyrra hálvleiki, og aftur tvey mál tíðliga í seinna hálvleiki.
Áðrenn Breiðablik legði seg á odda hevði Hallur ein góðan møguleika at stúta bóltin í netið fyri KR, men tað eydnaðist tíverri ikki at stýra bóltin í netið.
Breiðablik er fremst við 30 stigum, 11 stig frammanfyri Stjørnuna. KR er nummar seks við 16 stigum.
Sunnudagin spælir KR áttandapartsfinalu í steypakappingini móti Njarðvík á útivølli. Njarðvík spælir í triðbestu deildini, og tí verður sigur eitt krav til KR.
