Í dag høvdu Hallur Hansson og liðfelagarnir í Vendsyssel FF í næstbestu, donsku fótbóltsdeildini vitjan av Silkeborg, sum er millum favorittarnar at flyta upp í bestu donsku fótbóltsdeildina.
Dysturin endaði við javnleiki 1-1. Emil Scheel legði Silkeborg á odda, tá ein góður hálvur tími varð farin av dystinum.
Í 53. minutti javnaði føroyski landsliðsspælarin. Nicolas Bøgild legði eina fína sending inn í brotsteigin, har Simon Okuson hegnisliga vippaði bóltin yvir til Hall Hansson, sum beindi bóltin innum málstrikuna til 1-1.
Vendsyssel hevur fýra stig aftaná tveir dystir í næstbestu donsku fótbóltsdeildini.
