Hallstein er kendur maður í Føroyum, sum hevur verið virkin í ymsum felagsskapum. Í Ungdómslandsfelagnum, í Føroya Ungdómsráð, í Sosialistiskum Ungmannafelag, í Javnaðarflokkinum, í Norrønafelagnum – og so var hann í út við ein mansaldur postboð, fyrst í Havn, men seinni í Norðstreymi – til hann fór at standa fyri útberingini hjá Prentmiðstøðini, fyrst av Sosialinum og Dimmalætting, men eisini av øðrum prentlutum, sum Prentmiðstøðin í nøkur ár bar kring landið alt í kapping við almenna Postverk Føroya.
Sum eftirnavnið sigur, so er Hallstein Sigurðsson klaksvíkingur. Hann er sonur Margrethu, fødd Poulsen, av Eiði, og Sigurð Sigurðsson av Húsum. Abbin í móðurætt, Hans Jacob Poulsen, var fyrsti tingmaður Javnaðarfloksins, sum varð valdur í Eysturoyar valdømi. Tað var í 1936. Men hann doyði longu árið eftir í 1937.
Abbin í faðirætt var Jóin á Húsum. Hann varð føddur í Vestmannaoyggjum í Íslandi, og foreldrini vóru úr Mýrdalsvík. Tá ið Jóin var sjey ára gamal, kom hann við Geila Jákupi til Húsar, har hann vaks upp, giftist og bygdi. Um 1930 fluttu tey til Klaksvíkar, og harvið kom Sigurðsson eftirnavnið til Klaksvíkar.
Pápi Hallstein, Sigurð, doyði longu í 1960, tá Hallstein var ársgamal. Og mamman Margretha doyði í 2000.
Margretha og Sigurð fingu átta børn: Jóin (1940-2016), Hans Jacob (1941), Alfons (1943), Torleif (1946-2008), Thorbjørg (1949), John Tórur (1950), Terji (1956) og Hallstein (1959).
Hallstein Sigurðsson eigur sonin Trónd og stjúksonin Rana.
Hóast klaksvíkingur, so hevur Hallstein verið havnarmaður nú í eini 40 ár. Tað var longu í 1984, at Hallstein Sigurðsson stillaði upp til løgtingsvalið sum umboð fyri SU, Sosialistiskt Ungmannafelag. Væl gekst, hóast hann ikki rakk upp um tinggáttina – sum var lutfalsliga tung at røkka hjá einum ungdómsvalevni í valskipan við sjey valdømum. Javnaðarflokkurin hevði tveir sterkar tingmenn í Suðurstreymoyar valdømi, sum vóru tungir at syfta. Øðrvísi er í dag við einum valdømi, har tú sum valevni hjá Javnaðarflokkinum á seinasta vali bert skuldi verið innan fyri tey fremstu 15 fyri javnan at hava sæti á tingi.
Hallstein hevur eisini roynt seg á býráðsvali, og hevur hann havt fótin innanfyri nakrar ferðir. Men betur gekk, tá hann læt staffettina víðari til sonin, Trónd Sigurðsson, sum í løtuni er fyrstvaldi býráðslimur í Havn, valdur fyri Javnaðarflokkin við ikki færri enn 676 atkvøðum.
Sum vit nevndu omanfyri, so hevur Hallstein verið ógvuliga virkin í ymsum mentanarligum arbeiði. Í hesum hevur verið nógv norðurlendskt samstarv, og Hallstein er tað vit kunnu kalla ein ordiligur nordistur. Tí endaði hann eisini sum formaður í Norrønafelagnum í Føroyum. Hann kennir nógv fólk í øllum norðurlondum, og hann er upp á fornavn við nógvar kendar politkarar, sum hann hevur lært at kenna í ungdómsarbeiðinum undir Norðurlandaráðnum og í politisku skipanini, har hann hevur vinir úr at kalla øllum flokkum.
Hallstein býr í dag saman við Onnu Doris Mørkøre, sum er av Eiði, í vesturbýnum í Havn. Men sum tann nordistur hann er, so hevur hann eisini dvalt í Grønlandi í nøkur ár. Tí fyri seks árum síðani valdi hann at flyta til Grønlands at arbeiða. Sum tann royndi maðurin innan postvirksemi, hann var, fekk hann starv sum deildarleiðari hjá grønlendska postverkinum, Post & Tele, í grønlendska høvuðsstaðnum Nuuk.
Við Sosialin, sum hevði samrøðu við hann, tá hann fór avstað, segði hann soleiðis:
– Eg havi altíð droymt um at læra og liva í eini aðrari mentan. Eg fari ikki, tí eg eri troyttur av Føroyum, men nú havi eg fingið ein møguleika, ið eg vil sleppa at royna...
– Men nú skulu vit minnast til, at hetta er ikki forever, men snýr seg um trý ár. Eg komi heilt sikkurt aftur til Føroya, tað skal eingin ivi verða um tað, sigur Hallstein Sigurðsson.
Og Hallstein er tíbetur komin aftur, og tað kunnu vit øll fegnast um og ynskja Hallsteini hjartaliga tillukku við degnum og ynskja eina góða og hugnaliga veitslu leygarkvøldið!
Vinur
